Nokkur orð í belg

Mig langar að leggja nokkur orð í belg. Það gengur ekki hjá forsætisráðherra að finna ekki tíma til að hitta varaforseta  Bandaríkjanna. Hér er mikil skammtímahugsun í gangi og velferð landsins ekki höfð að leiðarljósi. Að skapa svona umtal eins og nú á sér stað er ekki það sem lítið land mitt í Atlandshafi þarf á að halda. Við lifum m.a. á því að flytja ferðamenn frá Bandaríkjunum til Evrópu og sem betur fer stoppa sumir hér við. Hverjum er verið að þjóna með þessari ákvörðun? Er alls ekki ánægð með þetta!

Hvort er mikilvægara mitt líf eða þitt?

Ég er landsbyggðarkona, uppalin úti á landsbyggðinni en bý í Reykjavík. Í öruggu umhverfi hvað varðar aðgengi að sjúkrahúsi sem  búið er fullkomnustu tækni sem þetta land á. Nú er ég föst úti á landi vegna slæmra veðurskilyrða, kemst ekki suður hvorki landleið né í flugi. Bíddu nú við svona dagar eru ekki oft á ári en fólkið hér úti á landsbyggðinni á von á því ef það veikist skyndilega og þarf að komast undir læknishendur sem fyrst þar sem nýta þarf alla tækni sem landið hefur völ á að komast ekki!! Halló!! Hvað er í gangi á þessu landi? Þið lokið ekki neyðarbrautinni fyrir veikum sjúklingum fyrr en annar valkostur jafngóður eða betri er kominn í staðinn! Það mætti halda að líf fólks á landsbyggðinni skipti ekki eins miklu máli. Alla vegana jöfnum möguleika allra að komast eins fljótt undir læknishendur og kostur er. Nú þarf neyðarbrautin að vera opin þangað til annað betra kemur í staðinn.

 

,Ég skammast mín fyrir að vera hvítur karlmaður." ,,Sigurður" 23. ára.

Nýlega ræddi ég við tvo unga karlmenn um jafnréttisbaráttuna. Allt ofbeldið, andlegt, líkamlegt og klisjur eins og karlmenn eru óþarfir var daglegt brauð á samfélagsmiðlunum. Okkur ofbauð umræðan. Gerum við okkur grein fyrir skaðsemi þessarar umræðu fyrir unga karlmenn? Er ekki komin tími til að staldra við og athuga hvort jafnréttisumræðan sé ekki farin að snúast upp í andhverfu sína. Það er deginum ljósara að það hefur hallað á karlmenn á síðustu árum, þeir eru með hærri  brottfallsprósentu, eiga erfiðara með læsið (30 prósent ólæsir), eiga hærri tölur þeirra sem eiga við hegðunarvanda að stríða og fleiri greiningar. Það er engin lausn að tala niður til þeirra stöðugt og brjóta sjálfsmynd þeirra niður. Allir sérfræðingarnir hér á landi ættu að geta greint vandann og komið með réttu lausnirnar. Auðvitað er rót að þessum vanda. Alhæfum ekki í umræðunni þannig að það brjóti niður sjálfsmynd drengjanna okkar. Fyrir 12 árum komu sérfræðingar frá Ástralíu með flottar lausnir hvernig þeim tókst að vinna í þessum vanda. Ég man alla vegana eftir að þeir bentu á nauðsyn þess að það væru fleiri karlkennarar í skólum.  Það væri mjög mikilvægt í ljósi fyrirmyndar og verkefnavals í námi. Einnig að þeim væri mætt betur tilfinningalega. Hlúum vel að báðum kynjum og gætum okkar í umræðunni að hún verði ekki of einsleit og niðurbrjótandi.

Bylgjan fær föstudagshrósið

Á leið í vinnu hlusta ég á Í bítið, á leið heim hlusta ég á Rvk síðdegis. Þessir þættir eru það áhugaverðir að ég hætti ekki á að skipta um stöð af ótta við af missa af einhverju.  Það er list að halda hlustendum við efnið. Þáttagerðarmennirnir í þessum þáttum ná að halda okkur áhugasömum, hafa sífelldan ferskleika á boðstólum og eru vakandi fyrir öllu sem gerist á liðandi stundu. Þið eigið hrós skilið fyrir frábæra þætti og málefnalega umræðu.  Öll sjónarmið fá að komast að og síðast en ekki síst er virðing fyrir fólki sem skiptir gífurlegu máli.

Kærar þakkir fyrir mun hlusta á ykkur aftur eftir sumarfríið og hlakka til.

World Class - ,,það er svo góður andi þar"

Í World Class hlýtur að vera starfsmannastefna sem er að virka. Það vill svo til að ég þekki á annan tug ungmenna sem vinna eða hafa unnið í World Class. Ég hef tekið eftir hversu glatt þetta unga fólk er í vinnunni sinni, því leiðist aldrei að mæta í vinnu og ber mikla virðingu fyrir starfinu. Aldrei heyrir maður þessi ungmenni tala öðruvísi en af virðingu um vinnustaðinn sinn.  Í vinnunni er vinátta, jákvæðni og hjálpsemi  greinilega gildi sem unnið er að. Fyrsta atvinnureynslan okkar er mjög mikilvæg og það getur skipt sköpum að sú reynsla sé góð.  Atvinna sem styður unga fólkið, styrkir sjálfsmynd þeirra og hjálpar þeim  mynda tengsl og öðlast trú á getu sína er það sem keppa ber að. Eins og einn ungur starfsmaður sagði: ,,Það er svo góður andi þarna, yfirmennirnir eru svo góðir". World Class er greinilega með'etta. Með starfsmannastefnu sem gæti verið öðrum fyrirmynd. Til hamingju með svona frábæra starfsmannastefnu!

Þeir finna sig hvergi - er ekki kominn tími til aðgerða?

http://ruv.is/frett/%E2%80%9Etheir-finna-sig-hvergi%E2%80%9C

Hreyfingarleysið er orðið alvarlegt meðal barna okkar - Nike N7 fund

Kíkið á þetta vídeo það segir meira en mörg orð

http://www.designedtomove.org/en_us/ 

Breytingar á umhverfi barna kalla á aðgerðir

Þjóðfélagslegar breytingar hafa verið gífurlegar síðustu ár

Miklar breytingar hafa átt sér stað hér á landi í umhverfi barna og unglinga síðustu áratugi.  Áður fyrr var í boði mikil vinna fyrir unglinga þannig að verklegt nám, dugnaður, skyldurækni, virðing o.s.frv. lærðist oftar en ekki í umhverfinu.  Börn og unglingar nutu í meira mæli samvista við eldri kynslóðir sem leiddi af sér fræðslu og leiðbeiningar.  Þannig var menningu miðlað milli kynslóða.  Þjóðfélagið hefur gjörbreyst síðustu áratugi.  Skorið hefur verið á milli stönguls og rótar í samskiptum milli hinna eldri og yngri.  Menning flyst þar af leiðandi ekki milli kynslóðanna lengur  eins og áður.  Hólfaskipting samfélagsins er hluti skýringarinnar þar sem við höfum hina elstu á elliheimilum og hina yngstu á leikskólum.  Öll sú viska og þekking sem eldri kynslóðin býr yfir fer forgörðum.  Dugnaður, tillitsemi, kurteisi, vandvirkni o.fl. sem lærðist í samskiptum við hina eldri og krefst tíma nýtur ekki lengur við. Fræðslan er á færri herðum og minni tími til fyrir hvern og einn.  Börn og unglingar eyða nú mörgum tímum á dag fyrir framan tölvuskjái og stöðug mötun á sér stað.  Samskipti margra barna fara í raun mest megnis fram í gegnum tölvu.  Of mikil innivera er staðreynd  og þar með  er hreyfingarleysið farið að taka sinn toll af heilsu barna sem t.d. má merkja með aukningu í offitu barna.  Þessar breytingar stuðla m.a. að því að börn hafa ekki þann grunn sem þau þurfa til þess að takast á við lífið. Umhverfi barna þarf að breyta!

 

Atgervisflótti frá landinu

Það er augljóst að við erum að upplifa atgervisflótta frá landinu. Duglegt ungt fólk sem vill betri aðstæður í lífinu er á förum! Því miður. Þar vega atvinnumöguleikarnir þyngst.  Þess vegna er mjög mikilvægt að huga vel að framtíðaraðstæðum fyrir unga fólkið þar sem atvinna skiptir höfuðmáli. Við lifum í samkeppni við önnur lönd um hvar er best að búa og ala upp börn. Ungt fólk ber saman þessa pakka s.s. atvinnumöguleika, skóla o.s.frv.  Það er nauðsynlegt að gera upp fortíðina en það má ekki allur kraftur fara í það. Það er nefnilega ennþá mikilvægara að byggja upp framtíðina. Hvernig framtíð viljum við bjóða hér upp á fyrir næstu kynslóðir?